Россия ҳукумати Финляндиянинг Петербургдаги консуллигини ёпди
Россия ҳукумати Финляндиянинг Петербургдаги консуллиги фаолиятига рухсат бериш қарорини чақиртириб олди. Россия Ташқи ишлар вазирлиги бунинг ортидан консуллик 1 октябрдан ёпилишини маълум қилди.
6 июль куни Россия ТИВга Финляндия элчиси чақиртирилгани хабар қилинган эди. Унга “Хельсинкининг Россияга қарши сиёсатидан норозилик билдирилган”. Москванинг нуқтаи назарича “Финляндиянинг НАТОга аъзо бўлиши Россия хавфсизлигига таҳдид солади".
ТАССнинг хабар беришича, бундан ташқари Россия ТИВ Финляндия элчихонаси ва бош консуллигининг тўққиз нафар дипломатини “исталмаган шахс” сифатида эълон қилди. Россия Финляндиядан тўққиз нафар рус дипломатининг бадарға қилинишига жавоб ўлароқ мана шундай қарор қабул қилган.
Май ойида Россия Финляндиянинг Петербургдаги бош консулхонасининг Петрозаводск ва Мурманскдаги ваколатхоналари 1 июлдан ёпилишини билдирган эди. Шунингдек, Москва Финляндиянинг Лаппеенранта шаҳридаги Россия элчихонаси канцелярияси фаолиятини ҳам тўхтатди.
Бунга жавобан Финляндия ҳукумати Россиянинг Турку шаҳридаги консуллигини ёпиши мумкинлигини билдирди. Финляндия апрель ойида НАТОга аъзо бўлган эди.