Путин “Вагнер” ХҲШ деган тузилма йўқлигини айтди
Россия президенти Владимир Путин “Вагнер” хусусий ҳарбий ширкати деган тузилма мавжуд эмаслигини билдирди. Аввалроқ у мазкур ширкат тўлалигича давлат таъминотида бўлганини айтган эди.
Путин “Коммерсантъ” нашри мухбири Андрей Колесниковга ўзининг “Вагнер” ХҲШ раҳбари Евгений Пригожин ва унинг командирлари билан ўтказилган учрашуви ҳақида сўзлаб берди. Мазкур учрашув июнь ойидаги муваффақиятсиз исёндан бир неча кун ўтгач бўлиб ўтганди. Путинга кўра, учрашувда у вагнерчиларнинг жанг майдонидаги ва “24 июнь воқеалари чоғидаги” хатти-ҳаракатларига баҳо берган ҳамда уларнинг кейинги тақдирига оид “муҳтамал вариантларни кўрсатган”.
“Коммерсантъ” мухбирининг: “Вагнер” ХҲШ жанговар бирлик сифатида сақлаб қолинадими?” деган саволига Путин: “Вагнер” ХҲШ мавжуд эмас”, дея жавоб берган. “Бизда хусусий ҳарбий ташкилотлар тўғрисида қонун йўқ-ку! Шунчаки мавжуд эмас”, деган Путин.
Икки ҳафта муқаддам Россия президенти “Вагнер” ХҲШни ширкат деб атаган ҳамда давлат “бу гуруҳни тўлалигича молиялаштирган”ини иддао қилган эди. Путинга кўра, бир йил ичида давлат бу ширкатга 86 миллиард рублдан зиёд маблағ тўлаган.
“Гуруҳ бор, лекин у ҳуқуқий жиҳатдан йўқ!” деган Путин бунинг “реал легаллаштириш билан боғлиқ алоҳида масала” эканини урғулаган.