Дональд Трамп «фитна чиқариш” айбловини тан олмади
Вашингтон суди 3 август куни собиқ президент Дональд Трампга 2020 йилдаги президент сайловларида мағлубиятини тан олмагани билан боғлиқ жиноий айбловни расман билдирилди. Трамп судда ўзига билдирилган айбловларни тан олмади.
Прокурорлар суд жараёни бошлангунига қадар Трампни ҳибсга олиш режаси мавжуд эмаслигини айтмоқда. Айни пайтда Трампдан жиноят иши бўйича фактларни ошкор қилмаслик ва Колумбия округи федерал судига кўрсатма бериш учун келишдан бош тортмасликни талаб қилинмоқда.
Судя бу талабларни бажармаса, Трампни қамоққа олиш учун ордер берилиши ва унга нисбатан судга хурматсизлик айблови олға сурилиши ҳақида огоҳлантирди.
Суднинг кейинги йиғилиши 28 август куни бўлиб ўтади. Шу куни суд жараёнининг расман бошланиш куни белгиланади.
1 август куни Дональд Трампга 2020 йилдаги президент сайловларида мағлубиятини тан олмагани билан боғлиқ жиноий айблов билдирилиши эълон қилинган эди. Трамп Конгрессга Жо Байденнинг ғалабасини тасдиқлашга имконият бермаслик учун (исми айтилмаётган) шахслар билан тил бириктирганликда ва “фитначилик”да айбланмоқда. 2021 йилнинг 6 январида Трамп тарафдорлари Конгресс Байден ғалабасини тасдиқлашига йўл қўймаслик учун Капитолийни ишғол қилган эди.
Бу Трампга билдирилган иккинчи жиноий айбловдир. 8 июнда Трампга миллий хавфсизликка оид бўлган махфий ҳужжатларни ноқонуний сақлаш бўйича саккизта айблов билдирилган эди. Трамп ўзига билдирилган айбловларни тан олган эмас.
Махфий ҳужжатларни сақлаш тартибини бузганлик айблови билан очилган жиноят иши бўйича суд жараёни 2024 йилнинг 20 майида бошланади.
Бундан ташқари Дональд Трамп ўз ишқий саргузаштларини ёпди-ёпди қилиш мақсадида порноюлдузга берилган катта миқдордаги маблағни яшириш учун ҳужжатларни сохталаштирганликда айбланмоқда. Мазкур айблов юзасидан у 2024 йилнинг 25 мартида Манхэттен судида ҳозир бўлиши лозим.
Трамп АҚШда жиноий айблов илгари сурилган илк собиқ президентдир. У 2024 йилда ўтадиган президентлик сайловида иштирок этишини эълон қилган.