Пул эвазига ер олиб беришни ваъда қилган қонунбузарлар қўлга олинди

Ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.

Асака туманидаги “Б.Д.” фермер хўжалиги раҳбари Р.У. ва фуқаро А.С. ўзаро тил бириктириб, 2 нафар фуқарога бошқа фермер хўжалигига қарашли 12 сотих ер майдонини 15 600 АҚШ долларига уй-жой қуриш учун сотишга келишиб, танишлари ёрдамида кадастр ҳужжатларини расмийлаштириб беришини айтиб, 10 200 АҚШ доллари ва 63 млн сўмни олган вақтларида ашёвий далиллар билан ушланди. Ҳолат Бош прокуратура ҳузуридаги Департамент ҳамда ДХХнинг Андижон вилояти бошқармалари томонидан ўтказилган тезкор тадбирда аниқланган.

Шу каби, Департаментнинг Наманган вилоят бошқармаси томонидан ўтказилган тезкор тадбирда, фуқаро М.Қ. фуқаро Д.О.га танишлари ёрдамида 10 000 АҚШ доллари эвазига Косонсой тумани “Ғўрмирон” МФЙдаги “Қ.Ш.” фермер хўжалигига қарашли 1 гектар ер майдонини чорвачилик йўналишида фойдаланиш учун ҳужжатларини расмийлаштириб беришини айтиб, 5 000 АҚШ доллари ва 11,7 млн сўмни олган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.