Дональд Трамп ўзининг қамоқхонада экани акс этган сувенирларни сотмоқда
АҚШ собиқ президенти Дональд Трамп ўзининг Жоржия штати қамоқхонасида олинган фотосуратлари акс этган сувенирларни сотувга чиқарди. У бу савдодан олинадиган даромадларини президентлик сайловолди тарғиботига сарфламоқчи. Трамп бугунги кунгача 7 миллион долларлик сувенир сотди.
Politico нашрининг Трамп сайлов штабига таяниб хабар беришича, биргина ўтган жума куни “қамоқхона сувенири”ни сотишдан собиқ президент тўрт миллион доллардан кўпроқ фойда кўрган. Бу АҚШ тарихида бир кун ичида сувенир сотишдан кўрилган энг рекорд фойдадир.
Трамп сайлов штаби интернетда собиқ президентнинг қамоқхонада тушган сурати акс этган ва “Ҳеч қачон таслим бўлма” деб ёзилган футболкаларни, плакатларни ва чанқоқбосди ичимликларини музлатиш учун ишлатиладиган воситаларни 12 доллардан 34 долларгача бўлган нархда сотмоқда.
Дональд Трамп 25 август куни Жоржия штатининг Фултон округи таркибига кирувчи Атланта шаҳри қамоқхонасида расмият юзасидан ҳибс қилинган ва шу соатдаёқ гаров эвазига озод этилган эди. Фултон прокуратураси Трампга бир неча кун олдин округда президент сайлови натижаларини сохталаштириш мақсадида тил бириктириш айбловини билдирганди.
22 август куни Дональд Трамп Жоржиядаги сайловларга аралашгани сабаб очилган жиноят иши доирасида ҳам ҳибсга олинмаслик учун 200 минг доллар гаров тўлаган эди.
Вашингтон суди 3 август куни Трампга 2020 йилдаги президент сайловларида мағлубиятини тан олмагани билан боғлиқ жиноий айбловни расман билдирганди. Трамп судда айбловни тан олмади.
Суднинг кейинги йиғилиши 28 август куни бўлиб ўтади.
Мазкур иш доирасида Трамп Конгрессга Жо Байденнинг ғалабасини тасдиқлашга имконият бермаслик учун (исми айтилмаётган) шахслар билан тил бириктирганликда ва “фитначилик”да айбланмоқда. 2021 йилнинг 6 январида Трамп тарафдорлари Конгресс Байден ғалабасини тасдиқлашига йўл қўймаслик учун Капитолийни ишғол қилган эди.
8 июнда Трампга миллий хавфсизликка оид бўлган махфий ҳужжатларни ноқонуний сақлаш бўйича саккизта айблов билдирилган эди. Трамп бу айбловларни ҳам тан олган эмас.
Махфий ҳужжатларни сақлаш тартибини бузганлик айблови билан очилган жиноят иши бўйича суд жараёни 2024 йилнинг 20 майида бошланади.
Бундан ташқари Дональд Трамп ўз ишқий саргузаштларини ёпди-ёпди қилиш мақсадида порноюлдузга берилган катта миқдордаги маблағни яшириш учун ҳужжатларни сохталаштирганликда айбланмоқда. Мазкур айблов юзасидан у 2024 йилнинг 25 мартида Манхэттен судида ҳозир бўлиши лозим.
Трамп АҚШда жиноий айблов илгари сурилган илк собиқ президентдир. У 2024 йилда ўтадиган президентлик сайловида иштирок этишини эълон қилган.