Хитойдан Ўзбекистонга темир йўл орқали юк ташиш бўйича янги йўналиш очилди
Хитой шимолидан Ўзбекистонга темир йўл орқали юк ташиш бўйича янги йўналиш очилди. Бу ҳақда “Синьхуа” агентлиги хабар қилди.
Агентлик қайдича, China Railway Beijing Group Co. Ltd ширкатига қарашли юк поезди 29 август куни Чжанжиаку шаҳридан Ўзбекистон пойтахтига қараб йўлга чиққан.
Автомобиль эҳтиёт қисмлари, маиший техника ва тўқимачилик маҳсулотлари юкланган 14 та контейнер платформасидан иборат поезд Тошкентга 15 кун ичида етиб келиши кутиляпти.
Хабарда янги йўналишнинг минтақа бўйлаб юк ташишни ривожлантиришда муҳим қадам бўлиши урғуланган.
Икки ой муқаддам Озодлик Хитойнинг Сиямен портидан Ўзбекистондаги Сергели станциясига Эрон орқали контейнер поезди ҳаракати йўлга қўйилгани ҳақида хабар қилган. Июль ойи бошида эса Хитойдан Лангфан-Қашқар-Эргаштом-Ўш-Тошкент йўналиши бўйлаб юк поезди йўллангани айтилган.
Бундан ташқари, ўтган йил августида Хитой шарқидаги Цзянсу вилоятига қарашли Уси шаҳридан, 2021 йил декабрида эса Хитойнинг Шэньси вилоятидан Ўзбекистон ва Қозоғистонга юк поезди қатнови йўлга қўйилгани хабар қилинган.