АҚШ элчихонаси 2023 йилги Green Card дастурининг эрта тугаганини очиқлади
АҚШ Давлат департаменти 2023 йилга мўлжалланган “Турли миллат вакиллари учун визалар” (Green Card) дастури бўйича мавжуд бўлган барча 55 000 та визани бериб бўлган. Бу ҳақда АҚШнинг Ўзбекистондаги элчихонаси маълумот тарқатди.
Дипломатик миссия қайдича, АҚШ Давлат департаментига ҳар йили қонунан тахминан 55 мингта виза беришга рухсат этилади. 55 000 та визанинг барчаси берилгач, ушбу дастур нафақат Ўзбекистонда, балки барча мамлакатларда ўша йил учун якунланган ҳисобланади.
Элчихона Green Card дастурига навбатдаги аризаларни қабул қилиш жорий йилнинг октябрь ойи бошида очилиши билдириб, ариза топшириш ҳуқуқига эга бўлган барчани унда иштирок этишга таклиф этган.
“Бу йил танлаб олинмаганлар яна дастурга ариза топширишлари мумкин. АҚШнинг Тошкентдаги элчихонаси навбатдаги “Турли миллат вакиллари учун визалар” (грин карта) дастури ҳақида қўшимча маълумот бўлиши заҳоти оммага эълон қилади”, дейилган баёнотда.
Қайд этилишича, элчихона грин карта бўйича виза интервьюси бекор қилинган аризачиларни тегишли равишда хабардор қилган.
Куни кеча АҚШнинг Тошкентдаги элчихонаси шу кунгача 3100 дан зиёд виза мурожаатчилари билан суҳбат олиб борилганини маълум қилган.
Ўзбекистон бир неча йилдан буён Green Card учун энг кўп ҳужжат топшираётган давлатлар рўйхатида пешқадамлардан бири бўлиб ҳисобланади.
2023 йилги грин-карта бўйича энг кўп ғолиб Миср (5529) ва Жазоирда (5526) қайд этилган. Ўзбекистон эса 5511 нафар ғолиб билан дунё бўйича рўйхатда учинчи ўринни эгаллаган.
1990 йилда асос солинган Green Card дастури доирасида ҳар йили қарийб 55 минг муҳожир АҚШда доимий яшаш ҳуқуқини қўлга киритади. Аввалроқ Оқ уйнинг амалдаги раҳбари Жо Байден грин-карта ғолиблари сонини 80 мингтагача ошириш кераклигини айтган.
Кейинги пайтларда АҚШга Мексика орқали ноқонуний киришга уринаётган ўзбекистонликлар сони ошиб бораётгани маълум. Бу ҳақда Озодлик яқинда ҳатто махсус суриштирувини ҳам эълон қилган.
Жорий йил бошида АҚШ элчихонаси Мексика чегараси орқали ноқонуний киришга уриниш хатарли эканидан ҳам огоҳлантирган.
Ўзбекистон АҚШ визасини олиш кўрсаткичи борасида салбий тенденция кузатилаётган давлатлар сафига киради. Давлат департаменти ҳисоботига кўра, 2022 йилда АҚШнинг Тошкентдаги элчихонаси “B” тоифали визалар (сайёҳлик ва бизнес визалари) учун мурожаат қилган Ўзбекистон фуқароларининг 47,04 фоизига рад жавобини берган.