Расман: Ўзбекистонда бир ойда нархлар яна 1,2 фоизга қимматлади. Бу сўнгги уч йилдаги энг юқори кўрсаткич
Давлат статистика агентлигининг билдиришича, сентябрда истеъмол нархлари 1,2 фоизга қимматлади. Агентлик бу сўнгги уч йилда сентябрь ойида кузатилган энг юқори кўрсаткич эканини қайд этган.
Шу билан бир қаторда, агентлик йиллик инфляция даражаси сўнгги беш йилликка солиштирганда энг оз кўрсаткични ташкил қилаётганини билдирган. Жорий йилнинг 9 ойида инфляция 5,13 фоизга етган. Бу ўтган йилнинг шу даврига солиштирганда 25 фоизга оздир. Аммо йиллик инфляция, ўтган йилнинг сентябр ойига нисбатан, 9,19 фоизга тезлашган.
Сентябрда озиқ-овқат маҳсулотлари 1,8 фоизга қимматлаган. Жумладан, ун нархи 15,7 фоизга, тухум нархи 7,8 фоизга ошган.
Йил бошидан бери гурунч нархи 1,5 баробарга, карам нархи икки баробарга ўсган. Агентлик йил бошидан бери ўсимлик мойи нархи 19,3 фоизга, помидор 46 фоизга арзонлаганини ҳам иддао қилди.
Ҳисоботда таъкидланишича, бензин 2,4 фоизга, метан 2,9 фоизга ва пропан 1 фоизга қимматлаган.