Умумтаълим мактабларнинг юқори синфлари учун 4 та йўналишда танлов фанлари белгиланди
Бу ҳақда АОКАда ўтказилган брифингда Мактабгача ва мактаб таълими вазирлиги ахборот хизмати раҳбари Дилфуза Собирова маълум қилди.
Таъкидлаш жоизки, ўқувчиларнинг қобилияти ва танлови асосида таълим жараёнларини ташкил этиш, юқори синф ўқувчиларини фанларга ихтисослашувини кенгайтириш ҳамда уларни олий ўқув юртларига йўналтириш учун кенг имкониятлар яратиш мақсадида қатор ишлар олиб борилмоқда.
Жумладан, Мактабгача ва мактаб таълими вазирининг 2023 йил 27 июндаги “Умумтаълим мактабларида юқори синф ўқувчиларининг қобилияти ва танлови асосида таълим жараёнларини ташкил этишни тажриба-синовдан ўтказиш тўғрисида” 192-сонли буйруғи қабул қилинди.
Мазкур буйруқ билан умумий ўрта таълим мактабларининг юқори синфларида (жорий ўқув йилида 10-синфларда) 4 та йўналиш (математика-физика, она тили-чет тили, кимё-биология, математика-чет тили) бўйича танлов фанлари белгилаб берилди ҳамда тажриба-синовдан ўтказиш тартиби, ўқув режалари, тушунтириш хати, тажриба-синовдан ўтказиладиган мактаблар рўйхати тасдиқланди.
2023-2024 ўқув йилида республика бўйича 135 та умумтаълим мактаблари танлаб олиниб, ушбу мактабларда жами 137 та синфларда 4 050 нафар ўқувчилар Президент, ижод, ихтисослаштирилган мактабларининг тажрибаларидан келиб чиқиб ишланган ўқув дастурлар асосида таҳсил олмоқда.
Хусусан, математика-физика йўналишида 16 та, она тили-чет тили йўналишида 51 та, кимё-биология йўналишида 40 та, математика-чет тили йўналишда 30 та синфларда ўқувчилар ўзлари қизиққан йўналишлари бўйича таълим олмоқда.
Шу билан бирга, ушбу мактабларга йўналишлар бўйича ҳар бир фан учун тақвим мавзу режалар ишлаб чиқилиб, таълим жараёнига татбиқ этилди ҳамда узлуксиз равишда Республика таълим маркази методистлари, Президент, ижод, ихтисослаштирилган мактабларининг тажрибали ўқитувчилари томонидан методик ёрдам кўрсатилиб келинмоқда.
Шунингдек, танлов фанлари асосида таълим олаётган ўқувчилар билими Президент, ижод ва ихтисослаштирилган мактабларда йўлга қўйилган янги форматив ва сумматив баҳолаш тизими асосида баҳоланади.
Келгуси ўқув йиллардан бошлаб, ўқувчиларининг қизиқиш ва қобилиятига қараб янги йўналишлар тавсия этилиши режалаштирилган.