Шавкат Мирзиёев сув хўжалиги соҳаси мутасаддиларини танқид қилди
Айни пайтда Шавкат Мирзиёев раислигида сув муаммосига бағишланган видеоселектор йиғилиши бўлиб ўтмоқда. Бу ҳақда президент матбуот котиби Шерзод Асадов маълум қилди.
Қайд этилишича, сўнгги икки йилда сув хўжалигига, жумладан, сув тежовчи технологияларга катта миқдорда субсидия ажратилган. Лекин ўтган йили истеъмол қилинган 39 миллиард куб метр сувнинг 36 фоизи тупроқ ўзанли канал ва ариқларда йўқолган.
Бундан ташқари, ерларнинг 70 фоизи эски усулда суғорилгани боис 5-6 миллиард куб метр сув беҳуда сарфланиб, коллекторларга ташланаётгани айтилди. Бугунги кунда 2,5 миллион гектар майдонни суғориш учун 5 мингдан зиёд насос ишлатилиб, йилига 7 миллиард киловатт соат электр сарфланади. Лекин, 80 фоиз насослар 35-40 йилдан бери ишлатилиб, ўз ресурсини ўтаб бўлган.
Давлат раҳбари сув хўжалигидаги бундай вазиятдан чуқур ташвишдалигини қайд этиб, соҳа мутасаддиларига қаттиқ эътироз билдирди.
“Каналларни бетон қилиш орқали йўқотишларни камайтириш, насосларни энергия тежамкорига алмаштириш, сув иншоотларида автоматлашган ҳисоблагич ўрнатиш юзасидан топшириқлар берилди”, — дейилади хабарда.
Шавкат Мирзиёев 22 сентябрь куни аҳолини сифатли ичимлик суви билан таъминлаш масалалари бўйича йиғилиш ўтказганди. Унга кўра, мамлакатда аҳоли саломатлигини яхшилаш ва ҳаёт сифатини оширишга қаратилган кўплаб ижтимоий, ҳудудий дастурлар бажарилмоқда. Хусусан, сўнгги олти йилда ичимлик суви соҳасига давлат бюджетидан 14 триллион 500 миллиард сўм ёки олдинги даврга нисбатан 6 баравар кўп маблағ ажратилган.