Уч фарзандини ўлдирган самарқандлик эркак умрбод қамоққа ҳукм қилинди
Жиноят ишлари бўйича Самарқанд вилояти суди 3 нафар вояга етмаган фарзандини (2 та қиз ва 1 та ўғил) қасддан ўлдирган 36 ёшли эркакка умрбод озодликдан маҳрум этиш жазосини тайинлади.
Бу ҳақда “Ёшлар” телеканалининг “Давр” дастурида хабар берилди.
Cудланувчи Жиноят кодексининг 97-моддаси 2-қисми “а”, “в” ва “ж” бандлари (айбдорга аён бўлган ожиз аҳволдаги, икки ёки ундан ортиқ шахсни, ўта шафқатсизлик билан ўлдириш) билан айбдор деб топилган.
Иш ҳужжатларига кўра, у қотилликни содир этаётган пайтда эс-ҳуши жойида бўлган, яъни гиёҳвандлик моддалари таъсирида бўлмаган.
Жамоатчиликни ларзага солган фожиа жорий йил 16 июнь куни соат 19:30 ларда рўй берган. Қотилликка Исроил давлатида ишлаб келаётган турмуш ўртоғи билан телефон орқали келиб чиққан зиддият сабаб бўлган.
Фарзандларини ошхона пичоғи билан ўлдирган шахс ўз жонига қасд қилишга уринган.