Миср ҳукумати томонидан тақдим этилган С гепатитига қарши дори воситаларининг навбатдаги туркуми Ўзбекистонга етказилди
Миср ҳукумати томонидан мамлакатимиз учун инсонпарварлик ёрдами тариқасида ажратилган С гепатитига қарши «Sofosbuvir-400mg» дори воситасининг навбатдаги туркуми Тошкентга жўнатилди.
Бу ҳақда «Дунё» АА хабар бермоқда.
Таъкидланишича, ушбу лойиҳа Ўзбекистон Президентининг Мисрга амалга оширган расмий ташрифи давомида эришилган келишувлар ҳамда мамлакатимиз раҳбарининг С Гепатитига чалинган беморларни 100 фоиз давлат ҳисобидан даволаш бўйича ташаббуси ижроси доирасида амалга оширилмоқда.
«Sofosbuvir-400mg» дори воситасининг навбатдаги туркумини Ўзбекистонга жўнатиш бўйича келишув жорий йил 3 октябрь куни мамлакатимиз дипломатларининг Миср соғликни сақлаш вазирининг ўринбосари Муҳаммад Ҳасаний билан олиб борган самарали музокаралари натижасидир.
Муҳаммад Ҳасаний мулоқот чоғида мамлакатимизда С гепатитидан даволанаётган беморларга кўмак беришни давом эттириш учун Миср Соғликни сақлаш вазирлигида жорий лойиҳани давом эттиришдан мамнунлигини ва гуманитар ёрдамнинг 16-туркуми доирасида С гепатитига қарши «Sofosbuvir-400mg» дори воситаларини етказиб берилишини билдирди.
Умумий қиймати 38 минг 456 АҚШ долларига тенг бўлган 3680 дона «Sofosbuvir-400mg» дори воситалари 21 октябрь куни Шарм аш-Шайхдан Тошкентга «UzAirways» АЖ кўмагида етказиб берилди.