Деновда “Жигули”нинг газ баллони портлаши оқибатида икки киши ҳалок бўлди
Сурхондарё вилоятининг Денов туманида “ВАЗ-2106” автомобилига ўрнатилган газ баллони портлагани оқибатида икки киши ҳалок бўлган.
Вилоят ИИБ ЙҲХБ ахборот хизмати Kun.uz сўровига жавобан ҳодиса 2023 йил 19 октябрь куни “Денов-Мобил” МЧЖга қарашли метан газ қуйиш шохобчасида содир бўлганини билдирган.
Хабарга мувофиқ, Денов туманида яшовчи фуқаро газ қуйиш шохобчасига пропан баллони ўрнатилган “Жигули” машинасини бошқа бир фуқаронинг машинаси ёрдамида олиб келган. Машинага метан газ қуйиш пайтида унга ўрнатилган баллон портлаб кетган. Натижада автомобилларга газ қуйиш шохобчаси ишчиси ва “Жигули”ни шохобчага олиб келишга ёрдам берган машина ҳайдовчиси воқеа жойида ҳалок бўлган, тан жароҳати олган “ВАЗ-2106” ҳайдовчиси эса касалхонага мурожаат қилган.
Ҳодиса юзасидан суриштирув ишлари олиб бориляпти.