ДХХ: Андижон ва Самарқанд вилоятларида прокуратура масъуллари пора билан қўлга олинди
Ўзбекистоннинг икки вилоятида прокуратура ходимлари пора олаётганларида қўлга тушганлар. Бу ҳақда Давлат хавфсизлик хизматига қарашли деб ишониладиган ХAVFSIZLIK Телеграм-канали маълумот тарқатди.
Хабарномага мувофиқ, Андижон вилоятининг Хўжаобод туман прокуратураси терговчиси ТИИБ тергов бўлими томонидан қўзғатилган жиноят иши бўйича гумонланувчига тергов давомида енгиллик яратиб бериш эвазига 5 минг доллар талаб қилган. Қўлга олинган ходим терговда фирибгарлик ва ҳужжатларни қалбакилаштиришда гумонланаётган шахсдан пул олиш кўрсатмасини унга туман прокурори ўринбосари берганлигини айтган, пировардида прокурор ўринбосари ҳам қамоққа олинган.
Самарқанд вилоятида эса, қайд этилишича, гумонланувчининг қариндошларидан 3 минг доллар талаб қилган Пастдарғом тумани прокурори ёрдамчиси қўлга олинган. У мазкур пул эвазига гумонланувчига нисбатан “суд жараёнида енгиллик қилиш ва суд идораларида ишловчи танишлари орқали қамоқдан чиқариш”ни ваъда қилган. Прокуратура вакили 2,5 минг долларни олаётган пайтда қўлга олинган.
Ҳар иккала ҳолатда ҳам коррупцияда гумонланаётган прокуратура ходимларига нисбатан мамлакат Жиноят кодексининг 168- ва 211-моддалари билан жиноят иши қўзғатилган, гумонланувчилар ҳибсга олинган.