Аргентина президенти Илон Маскка зарҳал занжирли арра совға қилди

^{Фото: AP}
Аргентина президенти Хавьер Милей АҚШ Мэриленд штатидаги Консерватив сиёсий ҳаракатлар конференциясида (CPAC) Илон Маскка олтин билан қопланган занжирли арра совға қилди. Маск буни «бюрократия учун арра» деб атади.

Занжирли арра тиғига «Viva la libertad, carajo» шиори ўйиб ёзилган бўлиб, бу сўзма-сўз «Яшасин озодлик, лаънати!» деган маънони англатади. Аргентина президенти бу иборани 2021 йилги парламент сайловлари ва 2023 йилги президентлик сайловида шиор сифатида ишлатган.

Аргентина президентининг идорасида айтилишича, занжирли арра Милейнинг кабинетида осилган арранинг айнан нусхаси. Унинг ўзи сайловолди ташвиқоти пайтида митингларга занжирли арра олиб бориб, ҳукумат аппаратига сарфланадиган харажатларни камайтирмоқчи эканини намойиш этди.

Ҳозир Илон Маск бошчилигидаги Ҳукумат самарадорлиги департаменти (DOGE) «ҳукумат бюрократиясини демонтаж қилиш» билан шуғулланмоқда. Аслида, бу турли федерал агентликлар учун молиялаштириш ва ходимларни қисқартиришни англатади.