Дам олиш кунлари об-ҳаво қандай бўлиши аниқ прогноз қилинди

Ўзгидромет маълумотига кўра, дам олиш кунлари об-ҳаво бир оз беқарор бўлади. 27 декабрь, шанба куни республика ҳудудларида асосан ёғингарчиликсиз об-ҳаво сақланади, фақат Қорақалпоғистон Республикасининг айрим жойларида ёмғир ёки қор ёғиши мумкин.

Якшанба куни Бухоро, Навоий, Тошкент, Самарқанд, Жиззах, Сирдарё ва Қашқадарё вилоятларида баъзи ҳудудларда ёмғир ёғиши кутилмоқда. Тоғли ҳудудларда ёғингарчилик ёмғир ва қор кўринишида бўлади, қолган ҳудудларда эса қуруқ об-ҳаво сақланиб туради.

Ҳаво ҳарорати шанба куни 7–12 даража илиқ, якшанба куни 10–13 даража илиққача кўтарилади. Кечалари 2 даража совуқдан 3 даража илиққача бўлади, шамол 7–12 м/с тезликда эсади, айрим жойларда туман тушиши мумкин.

Тошкентда шанба куни ёғингарчилик кутилмайди, якшанба куни эса куннинг иккинчи ярмида ёмғир ёғиши эҳтимоли бор. Қисқаси, дам олиш кунлари илиқ ўтади, аммо айрим ҳудудларда ёмғир ёғиши мумкин.