Каррагер «Арсенал»нинг «Астон Вилла»ни енгишини жуда муҳим деди
«Ливерпул»нинг собиқ ҳимоячиси Жейми Каррагер «Арсенал»нинг «Астон Вилла» устидан 4:1 ҳисобидаги йирик ғалабасини баҳолади. Бу ҳақда euro-football.ru хабар беради.
«Вилланлар» барча турнирларда кетма-кет 11 та ўйинда зафар қучиб, АПЛ жадвалида учинчи поғонага кўтарилганди. «Эмирейтс»даги учрашув арафасида бирмингемликлар «канонирлар»дан атиги уч очко ортда бораётганди.
Каррагер Sky Sports эфирида бу натижани «Арсенал» учун бир нечта жиҳатдан ниҳоятда зарур ғалаба деб атади. Унинг таъкидлашича, лондонликлар бу мавсумда илк бор ҳақиқатан ҳам кучли рақибга қарши ишончли ўйин кўрсатди, тўртта гол уриб, якунни хотиржам ўтказиш имконини яратди.
19 турдан кейин «Арсенал» 45 очко билан турнир жадвалида пешқадам бўлиб турибди. «Манчестер Сити» эса бир ўйини заҳирада бўлишига қарамай, лондонликлардан беш очко ортда.