Тошкентда таксистлардан мунтазам пул ундириб келган “Бычка” гуруҳи фош этилди
Тошкентда таксистлардан тизимли тарзда пул талаб қилиб келган уюшган жиноий гуруҳ фаолиятига чек қўйилди. Ички ишлар органлари маълумотига кўра, гумондорлар Тошкент вилоятидан пойтахтнинг Яшнобод туманига қатновчи ҳайдовчилар учун ойлик “тўлов” жорий этган. Бу ҳақда podrobno.uz хабар беради.
ИИВнинг билдиришича, гуруҳ аъзолари пул бермаган ҳайдовчиларни зўравонлик билан қўрқитган. Қайд этилган ҳолатлардан бирида гуруҳ етакчиси шериклари билан Damas ҳайдовчисини калтаклаб, даромад манбаи бўлган автомобилининг калитларини тортиб олгани ва жабрланувчига тан жароҳати етказгани айтилади.
Тергов версиясига кўра, яна бир ҳайдовчидан икки ой учун олдиндан 810 доллар олинган. У тўловларни тўлиқ амалга ошира олмагач, йўналишга чиқиши тақиқланган.
ИИВ маълумотида таъкидланишича, гуруҳ бошлиғи “Bychok” лақабли 37 ёшли, аввал судланган шахс бўлиб, у безорилик бўйича уч марта жавобгарликка тортилган. Ҳозирда товламачилик ҳолати юзасидан жиноят иши қўзғатилган.
Ҳуқуқ-тартибот идоралари мазкур гуруҳ ҳаракатларидан жабрланган фуқароларни ички ишлар органларига мурожаат қилишга чақирди.