Роналдунинг зал машғулотида қизи ҳам ёнида бўлди
Криштиану Роналду жуфти Жоржина Родригес ижтимоий тармоқларда янги сурат улашди. Кадрда 41 ёшли ҳужумчи спорт залида гантеллар билан машқ қилаётгани акс этган. Бу ҳақда euro-football.ru хабар беради.
Роналду ёнида қизларидан бири ҳам кўринади: у ҳам қўлида кичик, пушти рангли мини-гантелларни ушлаб туриб, отасига эргашмоқда. Жоржина суратга "Дада" деб изоҳ қолдирган.
Аввалроқ Родригес Роналду туғилган куни муносабати билан табрик постини ҳам эълон қилганди. Қизиқ жиҳати, бу табрик футболчининг 41 ёшга тўлганидан кейинги куни жойланган.
Сўнгги пайтда Роналду "Ал-Наср"нинг бир нечта ўйинларини ўтказиб юборди. ОАВда португалиялик футболчи клуб бошқарувидан норози бўлгани учун учрашувларни бойкот қилаётгани ҳақида хабарлар тарқалган.