Гальярдо кўз ёш билан хайрлашди: «Ривер»дан ҳеч ким бутунлай кетмайди
Марсело Гальярдо мураббий сифатидаги сўнгги учрашувини ўтказди. Жамоаси «Банфилд»га қарши баҳсда 3:1 ҳисобида ғалаба қозониб, кетма-кет учта мағлубиятдан иборат омадсиз серияга нуқта қўйди. Бу ҳақда euro-football.ru хабар беради.
Айнан ўша омадсиз натижалар Гальярдонинг лавозимини сақлаб қолишига тўсқинлик қилгани айтилмоқда. Шунга қарамай, клуб унга чиройли тарзда хайрлашиш имконини берди ва у бу лаҳзани жуда таъсирли тарзда ўтказди.
Ўйиндан кейин кўз ёшларини яширмаган Гальярдо трибуналар ва мухлисларга мурожаат қилди: «Ҳаммангизга шунчаки раҳмат. Бу меҳрни сўз билан ифодалаш қийин. Мен абадий кетмаяпман. «Ривер»дан ҳеч ким бутунлай кетмайди. Бу сеҳрли жой: кетсанг ҳам, барибир клуб билан қоласан», деди у.
Эслатиб ўтамиз, Гальярдо 1990-йилларда «Ривер Плейт» сафида ҳам, Аргентина терма жамоасида ҳам тўп сурган.