Brent нефти нархи бир кунда кескин пасайди
Жаҳон бозорида нефт котировкалари кескин пасайишни қайд этди. 10 март куни Brent маркали нефт фьючерслари нархи 6,51 долларга арзонлашиб, бир баррел учун 92,45 долларни ташкил қилди. Шу билан бирга, WTI маркали нефт нархи ҳам 6,12 долларга тушиб, 88,65 долларгача пасайди.
Business Insider нашри тақдим этган маълумотларга кўра, ушбу пасайишдан бир кун олдин қора олтин нархи 100 доллардан ошиб кетган эди. Ҳатто 2022 йил ёзидан бери биринчи марта 120 долларлик кўрсаткичга яқинлашиш кузатилганди. Бироқ, бозор кутилмаганда ўз йўналишини ўзгартирди.
Мутахассислар ушбу нарх ўзгаришини Яқин Шарқдаги геосиёсий вазият билан боғламоқда. Минтақадаги зиддиятларнинг бироз юмшаши ва барқарорлик сари умидлар пайдо бўлиши инвесторлар хавотирини камайтирди. Натижада, нефтга бўлган ваҳимали талаб пасайиб, нархлар яна ўзининг барқарор ҳолатига қайтишни бошлади.