Эрон янги олий раҳбари жароҳат олгани ҳақидаги хабарлар тарқалди
Исроил ва АҚШ расмийларига кўра, Эроннинг янги олий раҳбари Можтаба Хоманаий жароҳат олган бўлиши мумкин. Бу ҳақда The New York Times нашри турли манбаларга таяниб хабар берди.
Нашр ёзишича, айнан шу сабабдан Можтаба Хоманаий олий раҳбар этиб сайлангани эълон қилингандан кейин ҳам жамоатчилик олдида кўриниш бермаган бўлиши мумкин. Бу ҳолат эса турли тахминларга сабаб бўлмоқда.
Исроил манбаларининг билдиришича, Можтаба Хоманаий АҚШ ва Исроилнинг Эрон билан уруши бошланган илк кунларда жароҳатланган. Уларнинг айтишича, ўша пайтда отаси — оятуллоҳ Али Хоманаий ҳалок бўлган, Можтаба эса оёғидан яраланган.
Шу билан бирга, The New York Times’нинг Эрон ичкарисидаги манбалари ҳам Можтаба Хоманаий жароҳат олганини тасдиқлаган. Бироқ улар жароҳат қачон ва қандай шароитда юз берганига аниқ изоҳ бермаган.
Эрон президенти Масъуд Пезошкианнинг ўғли Юсуф эса бу маълумотларга муносабат билдириб, Можтаба Хоманаийнинг аҳволи яхши эканини маълум қилди. Шу сабабли унинг соғлиги борасидаги хабарлар ҳозирча турли қарама-қарши маълумотлар билан давом этмоқда.