Ламин Ямал ишонч билан: "Барса" камбэк қилишга тайёрми?
Каталониянинг машҳур гранди — “Барселона” жамоаси ҳужумчиси Ламин Ямал Чемпионлар лигаси чоракфиналидан ўрин олган “Атлетико”га қарши жавоб баҳси олдидан ўз фикрлари билан ўртоқлашди. Биринчи учрашувда 0:2 ҳисобида мағлуб бўлган “кўк-анорранглилар”ни Мадридда жуда жиддий синов кутмоқда.
Ёш, аммо аллақачон катта босимни ҳис қилаётган Ямал ушбу муҳим беллашув олдидан руҳий тайёргарликка алоҳида эътибор қаратмоқда. У ижтимоий тармоқлардаги аватарига LeBron James'нинг НБА кубоги билан тушган суратини қўйгани бежиз эмаслигини таъкидлади.
Футболчи бу орқали ўзини мотивация қилмоқчи эканини яширмади:
— Леброн — мени илҳомлантира оладиган инсонлардан бири. Шунинг учун айнан уни танладим. Унинг НБАда жамоаси билан 1:3 ҳисобида ортда қолиб, серияни 4:3га бурганини эслайман. Бу — ҳақиқий ирода намунаси. Мен ҳам худди шундай ҳолатни такрорлашга ишонаман, — деди Ямал.
Фoтo: Getty Images
Унинг фикрича, бугунги “Барселона” таркибида ўйинни ўзгартира оладиган футболчилар етарлича. Ямал ўзини жамоадаги ягона етакчи сифатида кўрмаслигини, аксинча, барча футболчилар биргаликда натижа учун курашиши кераклигини алоҳида таъкидлади.
Масъулият масаласига тўхталган ёш вингер шундай деди:
— “Барселона”дек клубда ўйнаётганимдан хурсандман. Бу ерда жуда юқори савияга эга, катта тажриба тўплаган ва ҳар мавсум ўз даражасини исботлаб келаётган жаҳон даражасидаги футболчилар жамланган. Шунинг учун ўйин фақат менга боғлиқ деб ўйламайман. Лекин шундай бўлса ҳам, мен бундан қочмайман. Жамоамдаги ҳар бир футболчи ҳал қилувчи рол ўйнаши мумкин ва мен уларга ишонаман.
Дарҳақиқат, “Барселона” учун олдинда турган ўйин — мавсум тақдирини белгилаб бериши мумкин бўлган ҳал қилувчи тўқнашувлардан бири. Камбэк қилиш осон эмас, лекин футболда имконсиз нарсанинг ўзи йўқ.
Маълумот учун, жавоб баҳси 14 апрель куни Мадрид шаҳридаги “Метрополитано” стадионида бўлиб ўтади. Энди барча нигоҳлар айнан шу учрашувга қаратилган — “Барса” мўъжиза қила оладими ёки “Атлетико” ўз устунлигини сақлаб қоладими?
