Әгерҗе футболчыларына шартлар яхшыра
Бу атнада стадионда Әгерҗедә футбол сезонын ачтылар.
Әлеге сезонны балаларга белем бирү-савыктыру үзәге һәм балалар-яшүсмерләр спорт мәктәбендә футбол белән шөгыльләнүче 150 яшүсмер күтәренке кәефтә каршы ала.
Сөенмәслек тә түгел шул: район башлыгы Валерий Макаров һәм “СтройГигант“ ширкәте директоры Тигран Агаджанян ярдәме белән савыктыру үзәгендә өч душ кабинасы ясалды.
– Бусагада – җәй. Тирләп-пешеп футбол уйнап кергәннән соң балалар рәхәтләнеп коенырлар, – дип сөенә үзәк директоры Валентина Федорова.
– Футболчыларга шөгыльләнергә шартлар начар түгел бездә. Заманча төзекләндерелгән стадионда уйныйсыз, тренерларыгыз менә дигән. Уңышларыгыз да куандыра. Бу сезонда да сездән яңа җиңүләр көтеп калабыз. Сез – безнең өметле спортчыларыбыз, – дип рухландырды футболчыларны район башлыгы Валерий Макаров.
“СтройГигант“ төзүчеләре язын-көзен су үтеп җәфалый торган түбәне дә алыштырганнар.
– Мондый мәрхәмәтле эшмәкәрләр булуына бик сөенәбез һәм аларга, җитәкчеләре Тигран Саркисовичка зур рәхмәтебезне белдерәбез, – дип Валентина Федоровна Рәхмәт хаты тапшырды.
Ә Валерий Макаровка бирелгән Рәхмәт хаты тагын да үзенчәлекле иде: анда яшь футболчылар фамилияләрен язып чыкканнар.
– Монысы – бигрәк тә истәлекле бүләк. Киләчәктә бәлки сез дә танылган футбол командаларында уйнарсыз. Ә мин әлеге Рәхмәт хатына карап сезнең Әгерҗе стадионында уйнаган чакларыгызны искә алырмын, – диде Валерий Владимирович.
Футболчылар җитәкчеләребезне яңа сезондагы уеннарын карарга да чакырдылар. Беренче уеннар бу шимбәдә, ягъни 25 апрельдә Удмуртия беренчелегенә Әгерҗе стадионында узачак.
Миләүшә ЯГЪФӘРОВА.