Чаллыдагы балалар бакчасында әти-әниләр сабыйларны кандалалар талаудан зарлана
Чаллыдагы «Чулпан» балалар бакчасында сабыйларны кандалалар тешләп бетергән. Әти-әниләре сүзләренчә, санитария эшкәртү булса да, ярдәме тимәгән. Бу турыда «Татарстан 24» телеканалы хәбәр итте.
Әти-әниләр әлеге хәл турында социаль челтәрләрдә яза, администрациягә мөрәҗәгать итә. Алар, сабыйлар бакчадан тешләнеп бетеп кайта, аннары кычыналар, дип зарлана.
«Аллергия куркынычы барлыкка килә. Аллергия – организмның чит аксымнарга реакциясе. Балаларда аеруча еш була, шуңа күрә алар кандала тешләүдән җитди зыян күрергә мөмкин. Кандала тешләгән вакытта организмга кертә торган төкерек – бик көчле аллерген», – ди табиб-педиатр Наталья Галеева.
«Чулпан» балалар бакчасына 80 сабый йөри, бу – 4 төркем. Шуларның 2сендә кандалалар бар.
Бакча мөдире Айгөл Хәйруллина сүзләренчә, алар үзләре бер тапкыр дезинфекция ясаган, бөтен иске матрацларны чыгарып ташлаган, урын-җирне алмаштырганнар. Икенче тапкырында белгечләр чакырып, башка кабинетларны да эшкәрткәннәр, диелә хәбәрдә.