(Казан, 9 сентябрь, «Татар-информ»). Россиянең тагын 12 шәһәренә «Хезмәт батырлыгы шәһәре» исеме биреләчәк. Россия Федерациясе Президенты Владимир Путин «Победа» оештыру комитеты утырышында шулай дип белдерде. «Мин әлеге мәртәбәле исем алулары белән Россиянең 12 шәһәрендә яшәүче халыкларны тәбриклим», — диде ил башлыгы. Ул указга тиз арада кул куеласын әйтте. Яңа статусны Оха, Ступино, Кострома, Лысьва, Сызрань, Мончегорск, Воркута, Алдан, Бологое, Чита, Дзержинск һәм Кемерово шәһәрләре алачак. Путин әлеге исемлекнең тулыланасын белдерде. «Безнең илебездә һәрбер гаилә дип әйтерлек, һәр торак пункт — барысы да Бөек Җиңүгә үз өлешен кертте. Шуның өчен, әлбәттә, хезмәт батырлыгы шәһәрләре исемлеген без тулыландырачакбыз», — диде ул. «Хезмәт батырлыгы шәһәре» — 1941-1945 елгы Бөек Ватан сугышы чорында тылдагылар күрсәткән батырлыкны мәңгеләштерү өчен 2020 елда кертелгән мәртәбәле исем. Ул Җиңүгә үзләреннән иң зур өлеш керткән, коллектив батырлык һәм кыюлык күрсәткән халкы өчен Россия шәһәрләренә бирелә.
