Татарстанда Бөек Ватан сугышы ветераны Гайфетдин Рәимов вафат булды
(Казан, 15 февраль, «Татар-информ», Эльза Кузнецова). Бөек Ватан сугышында катнашкан Гайфетдин Рәимов вафат булды. Быелның мартында аңа 95 яшь тулган булыр иде.
Гайфетдин Рәимов Мамадыш районында туган. Бөек Ватан сугышы башланганда аңа нибары 14 яшь була. Егетнең фронтка бик барасы килгән һәм ул анда 1944 елның октябрендә генә эләгә алган. Аны Көнбатыш флотның артиллерия дивизиясенә билгеләгәннәр.
Сугыштан соң Гайфетдин Рәимов авыл хуҗалыгы өлкәсендә эшләде. Ул авыл хуҗалыгы техникумын тәмамлады, соңрак шул ук юнәлеш буенча институтта укыды. 1967 елда Питрәч районына килгән. Шул вакыттан бирле монда эшләп, күп кенә чараларда — төрле ярышларда, спартакиадада һәм очрашуларда катнашкан.
«Татар-информ» мәгълүмат агентлыгына район хакимиятендә сөйләүләренчә, соңгы ике елда Гайфетдин Рәимов Казанда яшәгән, аны кызы караган.
«Мәрхүмнең туганнарының һәм якыннарының кайгысын уртаклашабыз», — диелә Татарстанның Питрәч районы матбугат хезмәте хәбәрендә.