Канащ похал нэңхэт Пулңават пеӆа лоңта ӆытӆат
Канащ похал нэңхэт Пулңават пеӆа лоңта ӆытӆат. Щи ораңна ӆув Приуральской район коща Иван Сакал па Пулңават коща Алексей Титовский пиӆна уйтантысат.
«Муң, похлаң нэңхэт, Приуральской район коща пеӆа письма китсу, щита муң ханссэв: хоты муңев щёкат Охсар похал пеӆа яңхта, нэпекӆу ӆэщатты щир антам, леккар хатна яңхта щи хуват тахайна ропытты порайна ищи ком антам. Щитна муң ӆытӆу Пулңават пеӆа ат ӆэщатӆаю», — Елена Куйбина лавас.
Иван Сакал лавты ясаңна, Канащ похал Пулңават пеӆа ки ӆэщатӆа, нэңхэт эӆты аӆт кон питӆ, щи порайна нэңхэт масты верӆаӆ, аса, хувви ант яңхман, верта веритта питӆаӆӆаӆ.
Итта, кощайт номасыта питӆат, нэңхэт пиӆна потарман, йи ёр понман, артаӆата, хоты похал вас пеӆа лоңаӆтта. Ас нопатты тыӆащ 27-мет хатӆна киметты яха актащӆат.
Вера Лонгортова хансам потар