Ирекле ярдәм күрсәтүчеләр кирәк
Бу турыда Казанда үткән Форумда сөйләделәр.
4-7 сентябрьдә районыбызның бер төркем яшьләре Татарстан Республикасының ирекле ярдәм күрсәтүчеләр форумында катнашып кайтты. Форум Казан шәһәренең «Пламя» балалар тернәкләндерү лагеры базасында үтте. Форум эшчәнлегендә Казан, Яр Чаллы, Әлмәт, Түбән Кама шәһәрләреннән һәм Алексеевск, Саба, Тәтеш районнарыннан килгән делегатлар үз өлешен кертте. Районыбыз данын исә ирекле ярдәм күрсәтү отрядларының җитәкчеләре Алена Мохото белән Илзинә Галиева яклап чыкты. Алар төрле чараларда, тренингларда, мастер-классларда катнашты, үз тәҗрибәләре белән уртаклашты, башка шәһәр-районнан килгән делегатлар белән аралашты.
Ирекле ярдәм күрсәтүчеләр форумында төрле яклардан килгән делегатлар 2015 елга үткәреләсе чараларның планын билгеләде, башка оешмалар белән тыгыз элемтәдә эшләргә кирәклеген ассызыклады (шул исәптән массакүләм-мәгълүмат чаралары белән дә), киләсе елларда актерлык осталыгы һәм социаль проектларны дөрес итеп төзү, аны кулланылышка китерү буенча төрледән-төрле мастер-класслар үткәрергә кирәклеге турында әйтелде. Форумда катнашучылар Татарстан Республикасы Президенты Рөстәм Миңнеханов, ТР Дәүләт Советы председателе урынбасары Римма Ратникова, ТР Яшьләр эшләре һәм спорт министры урынбасары Рөстәм Гарифуллин, шулай ук ирекле ярдәм күрсәтү үзәге директоры Анна Синеглазова белән очрашты.