Мәскәү өлкәсендә 165 меңнән күбрәк мөселман Ураза гаетенә мәчеткә килгән
Мәскәү өлкәсендә яшәүче 165 мең мөселман Ураза гаете көнне 55 мәйданда бәйрәм намазында катнашты. Россия Мөфтиләр шурасы шул турыда хәбәр итә.
Әлеге урыннар Мәскәү өлкәсе мөселманнарының Диния нәзарәте, төбәк хөкүмәте, шәһәр округлары администрацияләре, көч структуралары һәм профильле ведомстволарның координацияләнгән эше нәтиҗәсендә әзерләнде.
Ногинск Җәмигъ мәчете гадәттәгечә үзәк мәйданчык булды. Анда Мәскәү өлкәсе мөселманнарының Диния нәзарәте рәисе, мөфти Рушан Аббясов дин кардәшләренә вәгазь белән мөрәҗәгать итте һәм бәйрәм намазы укыды. Дин тотучыларны бәйрәм белән котлап, Рушан хәзрәт мөфти шәех Равил Гайнетдин, Россия Президенты Владимир Путин һәм Мәскәү өлкәсе губернаторы Андрей Воробьевның язма котлауларын яңгыратты, диелә хәбәрдә.