Вуӆы ёх емаң хатӆат ястасайт
Кашң таӆ округеван манты вуӆы ёх емаң хатӆат ястасайт, ун кер тыӆась унты манты питӆат. Оӆаң емаң хатӆ Надым вошан курк тыӆасян хольмаң пеӆа няӆмет хатаӆан манаӆ. Кашң вошан, куртан верты уйтантопсаятан каш ӆэсятӆа, касапсайт манӆат, тынасты харат ӆарпитӆайт, вантопсайт па ёнтты харат рупитты питӆат. Мойң хоятат шоши мир ёх уӆапса вантты верытӆат. Курк тыӆасян 24-25-мет хатӆатан Надым вошан округ куся Кубок хуват вуӆы тащан яңхты ёх касты питӆат. Си хатӆатан хоӆна Новый Уренгой вошан хоятат емаң хатӆа актасьӆат. Ай кер тыӆась кимет хатаӆан — Тарко-Сале па Красноселькупской районан шоши мир хоятат яха уйтантыӆат, 8-9-мет хатӆатан — Ӆорвош районан. Пулңавта па Приуральской района ай кер тыӆасян 23-24-мет хатӆатан шоши мир па мойң хоятат ёхатӆат. Тазовской районан хоятат емаң хатӆа 30-31-мет хатӆатан актасьӆат. Ямальской районан вуӆы ёх емаң хатӆ ун кер тыӆасян 6-7-мет хатӆатан постаӆа. Альбина Тырлина ханшам потар