Казанда Илһам Шакировка багышланган фестивальдә бөтен дөнья артистлары катнашачак

(Казан, 7 декабрь, «Татар-информ»). 7-8 декабрьдә Казан дәүләт мәдәният институтында Татарстанның һәм Россиянең халык артисты Илһам Шакировка багышланган «Илhамият» V Халыкара сөйләм һәм вокал сәнгать фестиваль-конкурсы була. Анда Пермь, Төмән, Әстерхан, Башкортстанның төрле шәһәрләреннән, шулай ук Үзбәкстан, Төрекмәнстаннан һәм башка дәүләтләрдән вокалистлар катнаша. Бу хакта оештыручылар хәбәр итә.

Фестивальнең бурычы — сәләтле балаларны һәм талантлы яшьләрне табу һәм аларга ярдәм итү. Конкурс географиясе елдан-ел киңәя бара.

Конкурсның жюри составына Татарстанның халык артисты Фердинанд Сәлахов, Татарстанның халык артисты, Татарстан Дәүләт җыр һәм бию ансамбле хормейстеры Венера Гәрәева, профессор, Россия һәм Татарстанның атказанган мәдәният хезмәткәре Наил Сафиуллин, Казан мәдәният институтының театр факультеты укытучылары һәм башкалар кергән.

Чараның мәртәбәле кунаклары арасында республиканың Мәдәният министрлыгы, Мәгариф һәм фән министрлыгы вәкилләре, театр һәм эстрада сәнгатенең атказанган эшлеклеләре, Г.Камал исемендәге театр артистлары, Татарстан язучылары булачак.

Фестивальне Казан дәүләт мәдәният институты оештыра.

Гала-концерт якшәмбе, 8 декабрьдә, 14.00 сәгатьтә башлана.