Монщнэңие

Хоятат хонна уна йитэӆ юпийн, ай пора верӆаӆ яма нумӆаӆӆаӆ. Йи щимащ хатӆ эӆты еӆӆы ӆуңтаӆн. Ай хорамаң паӆ вурамаң куртыенан Монщнэңие ус. Аңкеӆ-ащеӆ хоща, ӆув тумпеӆан, хонна нэ па ху апщеңан усңан. Ӆув нумасыйс: «Ай эви, ай пох самаңа тайӆайңан. Ма па антом. Щишан ун аңкем, ун ащем па щащем хоща манӆам». Ипуш, ӆонщаң па вотаң хатӆ юпийн ай Монщнэ аӆаң нох киӆас, вайӆаӆ па сахаӆ ӆумтамтас па овращӆаӆ хот пеӆа манас. Арпелак юшат ӆонщан ӆап вуямат, туп йи юш веӆщи яңхам. Монщнэңие щи юш хуват щи манас, нумасаӆ: «Там юш хуват овращӆам хоща аңкем-ащем пиӆан щи яңхиӆысам». Щи манаӆ, щи шушаӆ хорамаң ӆонщан лаңкам юхиет па варсыет вантыман. Ахоӆща сос ким навармас, ищиматты ки амп иты хортыӆыйӆ. Монщнэңие еша паӆтамас па щи войӆ еӆ нюхаӆты питсаӆӆы. Еӆӆы шуштаӆ сахат катра хотат кащаӆас, еша паӆтапан ёхатса. Ванты, уятсаӆӆы, овращаӆ хот эӆты щи катра хотат парта пелак сахат усат, ин па ям пелка питсат. Самаӆ манас, хун ахоӆща кумиты сый хуӆмас. Щаӆта юшан амуй орыман манты шуп кащаӆас. Монщнэңие ёхӆы карэмас па хухаӆты питас. Ахойн па ёӆта нюхаӆты щи щащаӆ! Орыты сый хурӆамтас па ащеӆ турсый хуӆас: «Эвие, наң хоӆта хухаӆӆан?» «Ма овращӆам хоща мантсам». «Наң па юш хуват манмен, ухӆа ӆэӆа, ин тохи туӆэм». Ухӆа ӆэӆамтас. Самаӆ воӆӆы аӆ ворӆыйс, хун овращаӆ хот кащаӆас. Аматман няврэм ёхи ракнас! Щащеӆа-овращаӆа тапиӆыйм щираӆ потарсаӆӆы. Юхат, ун отӆаӆан, ямас юш алям юпийн, веӆщи Монщнэңие атэӆ яңхты питас. Аллина Тоярова ханшам потар