Петербургда саясий куугунтукка каршы акцияда эки адам кармалды
Орусиянын Санкт-Петербург шаарында саясий куугунтукка каршы митингдин кеминде эки катышуучусун полиция кармап кетти. Алардын биринин колунда орус президенти Владимир Путинди "узурпатор" деп атаган плакат бар экенин "Медуза" басылмасынын кабарчысы билдирди.
Маалыматка ылайык, Петербургдагы бийликтин уруксаты жок өткөрүлгөн акцияга 50дөй адам катышууда. Алардын 15ке чукулу резонанс жараткан кылмыш иштеринин фигуранттарынын сүрөттөрүн кармап турушат. Полиция аларды тарап кетүүгө чакырып, болбосо күч колдонулаарын эскертти.
"Медуза" басылмасынын баңгизат соодасына байланыштуу кармалып, кайра коё берилген журналисти Иван Голуновго колдоо көрсөткөн жана бийликтен ондогон адамдарга каршы саясий куугунтукту токтотууну талап кылган мындай акциялар 23-июнда Москва, Владивосток, Самара сыяктуу бир нече шаарда да өттү.