(Казан, 16 октябрь, «Татар-информ»). Самара шәһәр округы «Иң яхшы муниципаль практика» Бөтенроссия конкурсында җиңүчеләр арасына керде һәм «Милләтара тынычлыкны һәм татулыкны ныгыту» номинациясендә дүртенче урынны алды. «Бердәмлек» газетасының инстаграмдагы сәхифәсендә хәбәр ителгәнчә, шул уңайдан шәһәр 20 миллион сум күләмендә акчалата премия алачак. Дәүләт милли сәясәтен гамәлгә ашыруда иң яхшы дип танылган Самара тәҗрибәсе 2021 елның 2 ноябрендә Мәскәүдә Халыклар бердәмлеге көне кысаларында узачак «Россия халыклары» II Бөтенроссия форумында тәкъдим ителәчәк.