Россия ТИВ матбуот котиби Захарова депутат Слуцкийни шилқимликда айблади
Захарова 10 март куни, “Леонид ресторанда менга жуда ноқулай сўзларни гапира бошлади”, деб айтди.
– Мен ўша ердаги одамлардан ҳайрон бўлдим... ўша пайтда лом-мим дейишмади, менинг ёнимни ҳам олишмади, – деди у Россиянинг НТВ телеканалига. Айтишича, кўнгилсиз воқеа беш йил олдин содир бўлган, у пайтда у "машҳур эмас эди”.
Захарова депутатни шилқимликда ошкора айблаган уч журналист аёл қаторига қўшилди.
RTVI телеканалининг муҳаррир ўринбосари Екатерина Котрикадзе, “Дождь” ТВ продюсери Дарья Жук ва Би-Би-Си Рус хизмати мухбири Фарида Рустамова – яқинда Слуцкийни шилқимликда айблаган эди.
50 яшар Слуцкий ноқонуний хатти-ҳаракатлар қилганини инкор этиб, айблаётган аёлларни судга бериш билан таҳдид қилди. Айни пайтда, 8 март куни Фейсбукдаги саҳифасида улардан узр сўради.