Дунэе экономикэ форумым хэлэжьагъ
Дунаим ихэгъэгуи 100-мэ къарыкIыгъэ нэбгырэ мини 4,5-м ехъу форумым хэлэжьагъ.Урысыем и Президент иадминистрацие я V-рэ Дунэе экономикэ форумэу мэлылъфэгъум и 18-м къыщегъэжьагъэу Ялтэ щыкIорэм изэхэщакIохэм ащыщ. Урысые Федерацием и Правительствэ и Тхьаматэ игуадзэу Дмитрий Козак ащ къыщыгущыIагъ. Къырымрэ Севастопольрэ хэхъоныгъэ зэрашIыщт федеральнэ программэр лъагъэкIотэн зэралъэкIыщтыр ащ къыIуагъ.
Дунаим ихэгъэгуи 100-мэ къарыкIыгъэ нэбгырэ мини 4,5-м ехъу форумым хэлэжьагъ. Ахэм ахэтыгъэх хабзэм ифедеральнэ къулыкъухэм яIэшъхьэтетхэр, шъолъырхэм япащэхэр, наукэм, бизнесым ялIыкIохэр, хэбзэихъухьэ къулыкъухэм ядепутатхэр. Адыгэ Республикэм и ЛIышъхьэу КъумпIыл Мурат зипэщэгъэ лIыкIо купри форумым хэлэжьагъ.
Урысые юрисдикцием хэхъоныгъэ егъэшIыгъэным, санкциехэм апэшIуекIорэ политикэр зехьэгъэным, цIыфхэм гъомылапхъэхэр афикъунхэм, научнэ разработкакIэхэм, бизнес цIыкIумрэ гурытымрэ зягъэушъомбгъугъэным япхыгъэ Iофыгъохэм мыщ щатегущыIагъэх. Инвестиционнэ зэзэгъыныгъэ ин заулэ форумым щадашIынэу, Iофтхьэбзэ 65-м ехъу, экономикэм иотраслэ 30-мэ афэгъэхьыгъэ сессие 60 фэдиз зэхащэнэу щыт.
Къырым инвестициехэмкIэ амалэу иIэхэм нэIуасэ зызщафашIын алъэкIыщт къэгъэлъэгъоным Адыгеим и ЛIышъхьэу КъумпIыл Мурат еплъыгъ, форумым ипленарнэ зэхэсыгъо хэлэжьагъ. Джащ фэдэу Адыгеим и ЛIышъхьэ Урысые Федерацием ишъолъыр заулэмэ япащэхэм аIукIагъ.
Дунэе экономикэ форумыр мэлылъфэгъум и 20-м Ялтэ щаухыщт.