Татарстан Дәүләт шурасының Канунилык һәм хокук тәртибе комитеты рәисе Шакир Яһүдин Чаллы депутатының республика Конституциясен гамәлдән чыгару турындагы мөрәҗәгатен "томаналык" дип бәяләде. Яһүдин Конституция шартнамәсез дә эшли, диде.
Берничә казанлы интернетта татарларны кимсетү турындагы сүзләр өчен Ольга Гавриленко-Зыятдинованы прокуратурага шикаять иткән. Гавриленко-Зыятдинова татарларны “чаплашка” дип атаган иде.
Уфаның 121нче санлы гимназиясенең өч сыйныф ата-аналары Путинга алман һәм француз телләрен гарәп һәм кытай телләренә алыштыруны сорап мөрәҗәгать иткән. Алар шулай ук мәктәпләрдә башкорт телен укытуны "күршедә яшәгән өчен генә өйләнергә мәҗбүр итү" белән чагыштыра.
Мәскәүнең Замоскворецкий мәхкәмәсе Русиянең элекке икътисади үсеш министры Алексей Улюкаевны ришвәт алуда гаепле дип тапты. Ул сигез елга хөкем ителде.
АКШ президенты Дональд Трамп һәм Русия президенты Владимир Путин пәнҗешәмбе телефоннан сөйләште. Алар башлыча Төньяк Кореяның атом-төш проблемы турында фикер алышкан, диелә.
Европа берлеге дәүләтләре башлыклары Русиягә карата чикләүләрне тагын алты айга озайту турында килеште. Бу хакта Европа Шурасы рәисе Дональд Туск белдерде.
Татарстан президенты Рөстәм Миңнеханов һәм Татарстан вице-премьеры, Дөнья татар конгрессы Милли шурасының җитәкчесе Васыйл Шәйхразиевның Италиядә яшәүче татарлар белән очрашуы социаль челтәрләрдә кискен тәнкыйтькә дучар булды.
