Ангорда фарзанди эртасига бефарқ оталар озодликдан маҳрум этилди
Оилавий муносабатлар миллатимизнинг қон-қонига сингиб кетган бўлиб, миллий урф-одатларимиз ва анъаналаримиз билан авлоддан авлодга ўтиб келмоқда. Оилавий қадрият ва анъаналаримизни сақлаб қолиш ҳар биримизнинг инсонийлик бурчимиздир.
Афсуски, бугунги кунда оилавий ажримларнинг аксарияти оилада ота-оналарнинг ўзларига юклатилган вазифаларни муносиб даражада уддалай олмаганликларидан келиб чикмокда, десак муболаға қилмаган бўламиз.
Энг ачинарлиси, ажрашгандан сўнг вояга етмаган норасида фарзандларининг моддий таъминотидан бўйин товлаб юрган ота-оналарнинг орамизда борлиги.
Ана шундай фарзандлари олдида масъулиятини унутган бемехр оталар иштирокида Ангор тумани фуқароларни ўзини-ўзи бошқариш Маҳалла Кенгашининг мажлислар залида Жиноят ишлари бўйича туман суди ва Маъмурий суди томонидан сайёр суд мажлислари бўлиб ўтди.
Мазкур сайёр судда суд қароридан бўйин товлаб, фарзандлари олдида бурчини унутган оталар кенг жамоатчилик иштирокида муҳокама қилинди.
Дастлаб, жиноят ишлари бўйича Ангор туман суди томонидан алимент қарзларини тўламагани учун Ўзбекистон Республикаси Жиноят кодексининг 122-моддаси 1-қисми билан судланаётган 3 нафар фуқароларга нисбатан тегишли жиноят иши кўриб чиқилди.
Жумладан, Ў.Жўраев фуқаролик ишлари бўйича Термиз туманлараро судининг 18.02.2014 йилдаги буйруғига асосан, вояга етмаган 3 (уч) нафар фарзандларининг моддий таъминоти учун алимент ундириш белгиланган. Ў.Жўраев бурчини ўз вақтида бажармаганлиги сабабли Ангор туман маъмурий суди томонидан 15 (ўн беш) сутка маъмурий қамоқ жазосига тортилганлигидан ўзига тўғри хулоса чиқармай, 17 миллион 114 минг сўм алимент пулларини тўлашдан қасддан бўйин товлаб келганликда айбли деб топилиб, унга нисбатан 1 йил муддатга озодликдан маҳрум қилиш жазоси тайинланди.
Шундан сўнг туман маъмурий суди томонидан алимент пулларини ўз вақтида тўламаган 13 нафар оталарга нисбатан Ўзбекистон Республикаси Маъмурий жавобгарлик тўғрисидаги кодекснинг тегишли моддаларига асосан 15 (ўн беш) сутка маъмурий қамоқ жазоси тайинланди.
Шунингдек, сайёр суд давомида Мажбурий ижро бюроси Ангор туман бўлими иш юритувида бўлган 2 нафар оиланинг ижро ҳужжатлари ҳаракатдан тўхтатилди. Сабаби, мазкур оилалар сайёр судда иштирок этган кенг жамоатчиликнинг тушунтириш тарғибот ишлари натижасида ўз хоҳишларига кўра ярашишди.
Фарзандларининг тақдирига бефарқ бўлмаган бу каби ота-оналарнинг ярашиш қарорлари жамият мустаҳкамлигини таъминлайди.