Тадбиркорларга карантин вақтида куйидаги фаолиятлар билан шуғулланишга рухсат берилди (фото)
Мамлакатимизда коронавирус пандемияси тарқалишининг олдини олиш юзасидан кенг қамровли ишлар амалга оширилиб борилмоқда. Ўз вақтида кўрилган чоралар натижасида Республикамизда эпидемиялогик вазият барқарорлашмоқда ва ушбу касалликлардан соғайганлар сони тоборо ортиб бормоқда.
Шу сабабли, Президентимиз томонидан ҳудудларда карантин тадбирларини юмшатиш бўйича бир қатор топшириқлар берилди.
Жумладан ҳудудларни «сариқ», «қизил» ва «яшил» тоифаларга ажратиш туман ва шаҳарлар даражасида ҳам амалга оширилиши белгиланди.
Республика махсус комиссиянинг навбатдаги қарори билан Республикамиз ҳудудлари 3 тоифага бўлинди:
“Яшил” тоифадаги ҳудуд – коронавирус инфекциясига чалинган шахслар аниқланмаган (ёки аниқланган шахслар тўлиқ соғайган) ҳудудлар. “Яшил” ҳудудларга бугунги кунда Навоий, Жиззах ва Қашқадарё вилоятлари киради.
“Сариқ” тоифадаги ҳудуд – охирги 14 кун давомида коронавирус инфекциясига чалинган шахслар аниқланмаган, бироқ ушбу касалликка чалинган ва даволанаётган шахслар мавжуд бўлган ҳудудлар. “Сариқ” ҳудудларга бугунги кунда Сурхондарё, Хоразм вилоятлари ва Тошкент шаҳри киради. Ушбу ҳудудда айрим чекловлар сақлаб қолинади.
“Қизил” тоифадаги ҳудуд – доимий равишда коронавирус инфекциясига чалинган шахслар аниқланаётган ҳудуд. “Қизил” ҳудудларга бугунги кунда Андижон, Наманган, Фарғона, Самарқанд, Тошкент, Бухоро ва Сирдарё вилоятлари киради. Бунда амалдаги белгиланган карантин чекловлари сақланиб қолади.
Йўналишсиз таксиларга – йўналишсиз автотранспорт воситаси салонида хайдовчи ўриндиғи йўловчилар ўриндиғидан шаффоф пластик ёки махсус плёнка билан тўсилган, хайдовчи ва йўловчи тиббий ниқобда бўлганда, шунингдек, йўловчи автотранспорт воситаси салонининг орқа ўриндиғига ўтказилганда фақат ўз ҳудудида ҳаракатланишига рухсат берилади.
Сартарошхона ва гўзаллик салонларига – хизмат кўрсатувчи шахслар томонидан шахсий ҳимоя воситалари – тиббий халат ёки комбинезон, тиббий ниқоб (N95 ёки 2 та оддий ниқоб), юзни тўлиқ тўсадиган ҳимоя маскаси ва тиббий қўлқопдан фойдаланган ҳолда “1 та хизмат кўрсатувчи шахс – 1 та мижоз” тамойили асосида ижтимоий масофани сақлаган ҳолда ишлашга рухсат берилади.
Фаолиятингизда вужудга келаётган муаммолар ва тўсқинликлар юзасидан мурожаатларингиз бўлган ҳолларда Бизнес-Омбудсманга мурожаат қилишингиз сўралади. Тадбиркорлар ҳуқуқлари қонун ҳимоясидадур.
Бизнес-омбудсман матбуот хизмати