Канада давлат хизматчиларига TikTok’дан фойдаланишни тақиқлади
Канада АҚШ ва ЕИдан ўрнак олиб, давлат хизматчилари қурилмаларида TikTok иловасидан фойдаланишга тақиқ жорий этди, деб ёзади The Wall Street Journal нашри.
Баъзи АҚШ ва Европа қонунчилари ва расмийлари Пекин TikTok’ни ўз фойдаланувчилари ҳақидаги маълумотларни баҳам кўришга ёки одамлар томоша қилаётган видеоларга таъсир ўтказишга мажбур қилиши мумкинлигидан хавотир билдиришди.
Ўтган ҳафта Европа Комиссияси ўз ходимларига иш қурилмаларида TikTok’дан фойдаланишни тақиқлади. Европа ўз йўриқномасини эълон қилган бир пайтда, Канада регуляторлари платформанинг махфийлигини текширишни бошладилар.
АҚШда федерал ҳукумат ва аксарият штатлар худди шундай тарзда давлат хизматчиларига қурилмаларда TikTok’дан фойдаланишни тақиқлаган.
Канада вазири Мона Фортьенинг таъкидлашича, расмийлар кўриб чиқишдан сўнг TikTok иловаси «махфийлик ва хавфсизликка йўл қўйиб бўлмайдиган даражада хавф туғдиради» деган хулосага келди.