Ўзбекистоннинг Теҳрондаги элчихонасида Бухоро бурчаги ташкил этилди
Эрон Ислом Республикасида жорий йилнинг 12 – 15 февраль кунлари ўтказилган “ХХVII Халқаро Теҳрон туризм ярмаркаси” кунлари доирасида Бухоро вилояти ҳокимлиги ва Ўзбекистон Республикасининг Эрон Ислом Республикасидаги элчихонаси раҳбарияти ташаббуси билан элчихона биносида Бухоро бурчаги иш бошлади.
Бухоронинг қадимий бой тарихи, илм-фан ва маданияти, ҳунармандчилик ва туризм салоҳиятини намойиш этувчи мазкур хона, ҳар бир ташриф буюрувчида юртимизга нисбатан катта қизиқиш уйғотади.
Бухоро бурчагини китоблар, тасвирий санъат асарлари, заргарлик, зардўзлик, каштачилик ва ёғоч ўймакорлиги каби ҳунармандчилик буюмлари билан тўлдирилгани ҳамда мамлакатимизнинг туризм салоҳиятига оид материаллар билан жиҳозлангани кўпчиликнинг кўнглидан жой олди.
Мухтасар айтганда, Бухоро бурчаги Эрон халқи ва меҳмонларни Бухоро ҳақида янада яқиндан танишишга ва юртимизга саёҳат қилишга чорловчи тарғибот хонаси сифатида катта аҳамият касб этади.