Лилия Хәйруллина, Аргентинага бала табарга барып, интегеп яшәве турында сөйләде

«Татарстан – Яңа гасыр» телеканалының социаль челтәрдәге «Ә син?» тапшыруында Лилия Хәйруллина кунак булды. Ул 11 мартта Аргентинаның башкаласы Буэнос-Айреста дүртенче баласын тапкан һәм яңа гына, бик сагынып, Казанга кайтты. Җырчы анда бала тапканчы һәм бала тапкач – барысы 4 ай яшәгән.

Җырчы чит җирдә аралашу җитмәве, туган телендә генә түгел, рус, инглиз телендә дә сөйләшергә кеше булмавы турында әйтте. Анда нигездә испанча сөйләшүләрен искәртте. Ул үзенең 3 ай тел өйрәнүен, әмма «ипи-тозлык» кына үзләштерергә өлгерүен белдерде.

Алып баручы Әбри Хәбри җырчыдан социаль челтәрдән югалып тору сәбәбен сорады.

«Социаль челтәрдән югалып тору сәламәтлек белән проблема булуга да бәйле. Депрессия дә булды, чөнки мин үзебезнең илне, шәһәрне якыннарны сагындым. Йөкле вакытта баш икенче төрле эшли, гармоннар уйный. Бик күп сәбәпләр аркасында...

Анда торган җирдә идән юганда егылдым. Аннары баланың хәрәкәтләнгәнен сизмәдем. Шуннан хастаханәләргә барып тикшерендем. Барысы да яхшы булуын әйттеләр. Мин йөкле килеш 42 атна диярлек йөрдем. Инде курка башладым. Күп йөрергә шулай ук ярамый. Табиблар «яхшы» диюгә карамастан куркасың бит инде. Йөкле килеш дәвалау алгач та борчылдым, кичергәннәр күп булды. Шул да тәэсир итте.

Аннары, бала тапкач, 2 атна «денге бизгәге» белән авырып яттым, ул – анда бик популяр чир. Черки тешли икән, шул бизгәк белән авырырга мөмкин. Мине черки тешләде, һәм мин авырдым. Температура, хәл юк, аппетит юк. Аллергик сәбәпләр дә, күп әйбер булды инде. Психологик һәм физик яктан да барысын да ерып чыктым. Ниһаять, кайттым. Шул кадәр интектем», – дип сөйләде җырчы.

«Аргентинага кайчан барасың?» – дип шаяртты Әбри Хәбри.

«Документ эшләре буенча барырга туры килер әле», – диде җырчы.

Лилия Хәйруллина югалып торуының сәбәбен әйтте – җырчы дүртенче тапкыр әни булган!

«Аргентина – бала табу өчен яхшы урын» – җырчы Лилия Хәйруллина 22 сәгать чит илгә очкан