Аш-су остасы Рәмзия Вәлиева кызын «стенага сикертә» торган авырудан дәвалауларын сөйләде
Казанда яшәүче аш-су блогеры Рәмзия Вәлиева, күпме борчылулар, йокысыз төннәрдән соң социаль челтәрдә яхшы хәбәр белән чыкты. Кызына операция ясаганнар, тик тәгаен нинди операция булуы турында хәбәр ителми.
«Хәлләр турында сорыйсыз. Күренмисең, дисез… Сезгә күренер кыяфәтем юк. 1 айлап йоклаган юк, нык арылды. Кызымның хәлләренә килгәндә: операция әйбәт узды, әлегә хәле юк. Хирург имплантны күрсәтте, ничек тора, нинди формада булуын. Бик куркып торган идек, бар да яхшы узды. Аллаһка шөкер. Нейрохирург аягына бастырып карады, азрак утырып тора, ятып тора», – дип сөйләде ул.
Рәмзия ханым операциягә кадәр кызының авыр хәлдә булуы турында язган иде. «Әле улым вафатыннан соң күз яшьләрем дә кибәргә өлгермәде, хәзер кызыма сынау килде. Бу операция кызымны түзә алмаслык авыртудан коткарсын иде. Нейрохирург әйтүенчә, бу авыру стенага сикертә. Кызым оныкларым хакына исән-сау котылсын. Балагызның күз яшьләрен күрергә язмасын», – дип белдергән иде җырчы.
Рәмзия ханымга сынаулар өеп бирелгән. Күптән түгел аның улы 37 яшендә авырудан кинәт вафат булды. Аның кияве дә махсус хәрби операциядә, аның әтиләрен сагынып елаучы оныкларын күреп тә йөрәге өзгәләнә. Әлбәттә, борчылулар эзсез узмый, үзе дә, кан басымы күтәрелеп, хастаханәдә ятып чыкты.