طالبان: په اسلاماباد کې به له امریکایي پلاوي سره وګورو
طالبان وایي چې د سولې د روانو هڅو په ترڅ کې به له امریکایي پلاوي سره د راتلونکي دوشنبې په ورځ د پاکستان په پلازمېنه اسلاماباد کې وګوري خو د امریکا د بهرنیو چارو وزارت یوه چارواکي وویل چې مرکچي پلاوي یې تراوسه د خبرو بلنه نهده ترلاسه کړې.
د طالبانو ویاند ذبیح الله مجاهد پرون په یوې خپرې کړې خبرپاڼه کې وویل چې دواړه لوري به مخکې له دې چې د فبرورۍ په ۲۵مه په قطر کې غونډه وکړي، په اسلام آباد کې سره وګوري.
خو د امریکا د بهرنیو چارو وزارت یوه ویاند وویل چې د طالبانو له دغه اعلانه خبر شوي خو د خبرو رسمي بلنه یې تراوسه نهده ترلاسه کړې.
د طالبانو ویاند دغه راز ویلي چې مرکچي پلاوی به یې دغه راز په اسلام اباد کې د پاکستان له صدراعظم عمران خان سره هم وګوري او د افغانستان او پاکستان پر اړیکو به هر اړخېزې خبرې وکړي.
طالبانو په خبرپاڼه کې ویلي چې د افغانستان د یوه ګاونډ او د یوه غښتلي پوځ لرونکې هېواد په توګه پاکستان کولای شي یوه جوړجاړي ته په رسېدو کې کلیدي رول ولوبوي او له بلې خوا هم پهدې هېواد کې شاوخوا یو نیم میلیون افغان کډوال اوسي.
د افغانستان د سولې او پخلاینې لپاره د امریکا د بهرنیو چارو وزارت د ځانګړي استازي زلمي خلیلزاد په ګډون د امریکایي چارواکو او د طالبانو د مرکچیانو ترمنځ خبرې پهدې وروستیو میاشتو کې ګړندۍ شوي دي.
ښاغلي خلیلزاد او د طالبانو استازیو دواړو په ترسره شویو خبرو کې د پرمختګونو خبر ورکړی خو امریکایي چارواکو پهدې اړه له احتیاطه کار اخېستی او ویلي یې دي چې یوې نهایي موافقې تر رسېدو پورې ډېر کارونه شته چې باید ترسره شي.
ټاکل شوې چې ښاغلی خلیلزاد او ورسره پلاوی یې شپږو هېوادونو ته د روان سفر په ترڅ کې پاکستان ته هم ولاړ شي.
پهدغه سفر کې چې د روانې میلادي میاشتې تر ۲۸مې دوام کوي، امریکایي پلاوی بلجیم، جرمني، ترکیې، قطر او افغانستان ته هم ځي.