Убиени 11 шиитски рудари во рудник за јаглен во Пакистан
Вооружени лица убиле 11 шиитски рудари од групата Хазара во рудник за јаглен во провинцијата Балучистан. Нападот се случил во близина на наоѓалиште за јаглен во близина на Мах, околу 48 километри источно од главниот град на провинцијата Квета. Шестмина од рударите биле убиени на самото место, а петмина кои биле тешко ранети починале на пат кон болница. Биле нападнати само рударите од шиитска заедница Хазара.
Полициската истрага открила дека рударите имале заврзани очи и заврзани раце пред да бидат застрелани. Ниту една група не презеде одговорност за убиството. Премиерот Имран Кан преку твит го осуди „убиството на 11 невини рудари“ како „кукавички нехуман терористички чин“.
Припадниците на шиитското малцинство Хазара во минатото беа мета на сунитски милитантни групи, вклучувајќи ја и екстремистичката Исламска држава (ИД), и во Авганистан и во Пакистан.