Во Бугарија утре парламентарни избори
Според последните проучувања на јавното мислење во Бугарија, владејачката партија на премиерот Бојко Борисов – ГЕРБ води пред најголемата опозициска партија БСП со 7 до 8,5 проценти.
ГЕРБ според сите испитувања ќе биде првата политичка партија во новиот бугарски парламент, меѓутоа аналитичарите предвидуваат дека стравот од ковид-19, пред сè кај повозрасните гласачи, може да влијае на одлуката дали да се излезе на гласање.
Како што пренесува МИА од Софија, аналитичарите прогнозираат дека доколку околу 45% од гласачите излезат утре на гласање во Бугарија, тоа ќе им помогне на ГЕРБ и нејзините потенцијални партнери да останат на власт, но ако надмине 51%, можно е опозицијата да се обиде да формира нова влада.
И по изборите во Бугарија декларацијата на бугарскиот парламент останува
На политичката сцена во Бугарија се појавија партиите и коалициите кои летото 2021 година учествуваа во протестите против власта на ГЕРБ.
Според истражувањата, новата опозициска група со најдобри перформанси е „Има таков народ“ на телевизискиот водител и шоуменот Слави Трифонов, која може да земе 12,5% и да го престигне Движењето за права и слободи, кое отсекогаш било трета политичка сила во бугарскиот парламент. Партијата „Исправи се! Мутри надвор!“ на поранешниот народен правобранител Маја Манолова би добила 6,3%, додека партијата на поранешниот министер за правда Христо Иванов „Демократска Бугарија“ може да освои 6,5%. Според повеќето анкети на јавното мислење, ВМРО на Красимир Каракачанов го преминува изборниот праг и ќе влезе во новото Бугарско национално собрание со од 4% до 4,4%.