Татарстанда 1 градуска кадәр җылыта
(Казан, 2 гыйнвар, «Татар-информ»). Иртәгә, 3 гыйнварда, бүгенге бераз гына суыктан соң, Татарстанда янә җылытачак. Бу хакта ТР Гидрометеорология һәм әйләнә-тирә мохитне күзәтү идарәсе хәбәр итә.
Вакыт-вакыт кар явачак, көндез урыны белән юеш кар булуы көтелә. Кайбер урыннарда аз гына бозлавык булырга мөмкин. Көньяктан һәм көньяк-көнбатыштан талгын җил булачак. «Юлларда бозлавык, урыны белән көчле», - дип кисәтә синоптиклар.
Төнлә термометр баганасы -11, аязган вакытта -16 градуска кадәр төшәчәк. Көндез һава температурасы -4 тән +1 градуска кадәр тәшкил итәчәк.