Татарстанда агачка бәрелгән сөт машинасының йөртүчесен хастаханәгә озатканнар
(Казан, 13 гыйнвар, «Татар-информ», Полина Шевчук). Татарстанда сөт ташый торган машина юлдан чыгып китеп, агачка килеп бәрелгән, җәрәхәтләнгән шоферны хастаханәгә озатканнар. Бу хакта «Татар-информ»га юл-транспорт һәлакәте шаһитлары сөйләде.
Һәлакәт шаһитлары сүзләренчә, авария дүшәмбе көнне, 13 гыйнварда, Җиде Чишмә авылының Үзәк урамында булган.
Әлегә ачыкланмаган сәбәпләр аркасында, сөт ташучы автомобиль юл читенә төшеп китеп, агачка килеп бәрелгән.
Авариядә йөк машинасы шоферы зыян күрә. Ир-атны төрле җәрәхәтләр белән Буа районы хастаханәсенә китерәләр.