Әлмәт шәһәрен карантинга ябу турындагы сүзләр дөреслеккә туры килми
(Әлмәт, 27 июнь, «Татар-информ», « Әлмәт таңнары»). Әлмәттә шәһәрне ябу турында сүзләр йөри. Бүген Әлмәт районы башлыгы Тимур Нагуманов Инстаграмда уздырган чираттагы туры эфиры барышында бу уңайдан аңлатма бирде. Бу турыда район басмасы хәбәр итә.
Катлаулы санитар-эпидемиологик вазгыятькә бәйле рәвештә, Әлмәтне карантинга ябарга планлаштырулары турындагы имеш-мимешләрне башлык кире какты.
Аның сүзләренчә, бу уңайдан федераль һәм республика хакимиятеннән бернинди күрсәтмә дә юк. Шулай да коронавирус белән бәйле вазгыять һаман да тотрыклы түгел, әмма ул контрольдә, диде ул.